நேற்று மாலை பெற்றுக் கொண்ட
ஒரு சிறிய உதவி

இந்த அதிகாலையில்
பளபளக்கும் கண்களால்
உற்றுப் பார்க்கிறது

அது
ஒரு நிபந்தனை
அல்லது கட்டளை

இந்த நாளுக்கான
பசி

இந்த நாளை எங்கிருந்து தொடங்க வேண்டும்
என்ற அறிவித்தல்

ஒரு திருட்டுப் பொருளை
திரும்ப வைப்பது போல
பெற்றுக் கொண்ட ஒரு உதவியை
திரும்ப வைக்க வேண்டும்

ஒரு நன்றியால்
ஒரு புன்னகையால்
அவ்வளவு எளிதாக
அது தீர்க்கப்படுவதில்லை

உதவிகள் காயத்தைப் போல
நினைக்கப்படுகின்றன
அளித்தவர்களாலும்
பெற்றுக்கொண்டவர்களாலும்
சாட்சியாக இருந்தவர்களாலும்

அவை எதிர்பாராத ஒரு தருணத்தில்
சொல்லப்படுகின்றன

நீங்கள் அடிவயிற்றில்
கத்தியால் குத்தப்படுகிறீர்கள்

அல்லது
நிர்வாணமாக
ஒரு ஐஸ்கட்டியின்மீது படுக்க வைக்கப்படுகிறீர்கள்

எல்லாவற்றையும் திரும்பக் கொடுப்பதற்கு
நமது கலாச்சார வாழ்க்கை
ஏராளமான வழிமுறைகளைக் கற்பித்திருக்கிறது

நமது சிகரெட்டிற்கு
ஒரு தீக்குச்சியைக் கொடுத்தவருக்கு

ஒரு குழப்பமான சந்தியில்
நமக்கு வழி சொன்னவருக்கு

ஒரு கோப்பைத் தேனீரையோ
மதுவையோ
உள்ளன்போடு பகிர்ந்து கொண்டவருக்கு

யாசகமிட்டவருக்கு
யாசிக்கும் கைகளில் முத்தமிட்டவருக்கு

எல்லோருக்குமே
ஏதேனும் ஒரு வழியில்
திரும்பக் கொடுத்துவிடுவது நல்லது

விசுவாசம் நம்மை பிணையக் கைதிகளாக்குகிறது
நன்றியுணர்ச்சிகள் நம்மை உறுதியற்றவர்களாக்குகின்றன
துரோகம் நம்மை நிரந்தரமாகக் கறைப்படுத்துகிறது

ஒரு முறை
ஒரு பறவையைத் தந்துதவியவருக்கு
நான் ஒரு புலி நகத்தைத் திரும்பத் தந்தேன்

என்னிடமிருந்த ஒரு ரகசிய வரைபடத்தைப்
பெற்றுக் கொண்ட ஒருவர்
ஒரு குருதி தோய்ந்த வாளை
எனக்குப் பரிசளித்தார்

பணத்தாலும்
அன்பாலும்
விபச்சாரத்தாலும்
சொற்களாலும்
ஏராளமான உதவிகள்
சுலபமாக திரும்பச் செலுத்தப்பட்டுவிட்டன

பரஸ்பர உதவிகளால்
உடனடியாகத் தீர்க்கப்படாதவை
மறுமை நாளில் கேட்கப்படலாம்

ஒரு முறை நீ
உன் மகத்தான காதலால்
என்னை மரணத்திலிருந்து
விடுவித்தாய்

பதிலுக்கு
கடவுள்
உன் முகத்தை எனக்கு
நிரந்தரமாக
மறந்துபோகச் செய்தார்.

*