சீப்பில் முகம் பார்த்துக்கொண்டே
கண்ணாடியால் தலைவாரிக் கொண்டேன்
வேலைக்கு நேரமாகிவிட்டது.
*
சாவுச் செய்தி வந்த காலையிலும்
கிளைகளில் நிதானமாக
சோம்பல் முறிக்கின்றன வண்ணத்துப் பூச்சிகள்
*
புத்தம் புதிய மூக்கணாங்கயிருடன்
கம்பீரமாய் நடைபோடுகின்றன
மாட்டுப் பொங்கல் மாடுகள்
*
புத்தாண்டுக் காலையில் குழந்தை
காய்ச்சலில் தூங்குகிறாள். இம்முறை
புத்தாண்டு ஒருநாள் தாமதமாகப் பிறக்கும்
*
என்னைப்பற்றித்
தெரிந்துகொள்ளத்தான் வேண்டுமா?
தெரிந்துகொள்ளுங்கள்
மரத்திலிருந்து உதிர்ந்த
இன்னும் தரைக்கு வராத இலை
*
நடந்துகொண்டே இருந்தால்
சேரவேண்டிய ஊர் வருமா
தெரியவில்லை
ஆனால் நிச்சயம் நிலவு வந்துவிடும்
*
தொலைந்த மாட்டை அந்தியின்
மலையடிவாரமெங்கும் தேடுகிறேன் எங்கோ
புல்வெளியில் மேய்கிறது அதன் மணியோசை
*
பிரிவுக்குப் பிந்தைய சந்திப்பின்
இந்தக் கண்ணீரைக் காணத்தான் வந்தேன்
இனி கண்ணீரில்லாமல் பிரிந்து செல்வேன்
*
எதிர்பாராத விருந்தாளிக்கு
என்னிடம்தர எதுவும் இல்லை
ஒரு கோப்பை குளிரைத்தவிர
*
ஒரு எரியும் அடுப்பு
அல்லது ஒரு கதகதப்பான உடல்
இரண்டும் ஒன்றுதான் இக்கடும் பனியில்
*
எனக்குக் கிட்டாதன யாவும்
என் நண்பர்களுக்குக் கிடைத்தன.
நல்லது
வழிப்போக்கனுக்குத் தேவை சிறு நிழல்கள்
*
பெண்மைக்குத்தான் எத்தனை நடனங்கள்
நீராடிச்சென்று நெடுநேரமாகியும்
குளியலறையில் நடனமாடுகிறது
உன் சோப்பின் வாசனை
*
நான் யார் என்பது
எனக்கு மட்டுமே தெரியும்
வனத்தில் உதிரும் மலர்போல அத்தனை ரகசியம்
*
ஒரு அழகிய இளைஞனைக் கண்டேன்
நீ முதல் சந்திப்பிலேயே அவனைக் காதலிக்கக்கூடும்
நான் நீயாக இருப்பதற்கு ஒரு எல்லையில்லையா?
*
குடிகாரனை வெறுங்கள்
அவனைக் கைவிடுங்கள்
துணையாக வீடுவரை வருகிறது கடும் பனி
*
பசியை மாற்ற முடியாது
பசிக்கான யுத்தத்தை மாற்ற முடியாது
நூற்றாண்டு “மெனு” வையேனும் மாற்று.
*
திருவிழாவின் கடைசி மணிநேரங்கள்
கண்ணுக்குத் தெரிகிற யாவும் மறைந்துவிடும்
காலி மைதானத்தில் பனி தனியே பெய்யும்
*
லண்டனில் இப்போது கடும் பனி என்றாள்
சென்னையில் இப்போது கடும் குளிர் என்றேன்
நாம் என்பது இப்போது வெறும் பனி
*
அன்பின் கதவுகளைத்
திரும்பத் திரும்ப தட்டாதே
கல்லறை ஆவிகளுக்குத் தூக்கம் கெடுகிறது
*
பனியையும் நிலவையும் தவிர
தெருவில் யாருமில்லை;
இந்தக் காட்சியைக் காணும் நான் கூட அங்கு இல்லை
*
ஒரு குழந்தை வாழ்த்து வேண்டி
என் காலில் பணிந்து வணங்குகிறாள்:
பதிலாக
குழந்தையின் காலில்விழுந்து வாழ்த்தினேன்
*
மீசைக்குக் கருவண்ணம் தீட்டிக்கொள் என்றாள்
நான் முதுமையடைவதை அவள் விரும்பவில்லை
என் இளமையின் அந்தியில் கருப்பு வானவில்
*
இந்தக் காதலுக்கு எந்தப் பிடிமானமும் இல்லை
இந்த உறவிற்கு எந்த எதிர்காலமும் இல்லை
இருந்தும் தளும்புகிறோம் எந்நேரமும்
*
இன்னும் தூங்காமல் என்ன செய்கிறாய் என்றாள்
பனியில் நனைந்த நிலவை
வெறும் கையால் துடைத்துக் கொண்டிருக்கிறேன்
*
இந்த உலகின் ஒரே நேர்மையான உணர்ச்சி
பசி மட்டுமே; வேறெதுவும் பேசுவதற்கில்லை
பசி தீர்ந்ததும் எதிரிகளை மறந்துவிடுகிறேன்
*
விவாகரத்திற்குப் பிறகு
தன்பெயரோடு
கணவனின் பெயருக்குப் பதில்
தந்தையின் பெயரை மாற்றிக்கொண்டாள்
இல்லாத
தந்தைகளிடம் திரும்பும் மகள்கள்
ஒரு கணம் அத்தனை தனிமையாக
மனம் உடைந்து அழுகிறார்கள்
*
ஒரு நாள் உன்னை எப்படிப் பிரிந்திருப்பது என கண்ணீர் சிந்தினேன்;
பிறகு 10 வருடங்கள்
எப்படிப்போனதென்றே தெரியவில்லை
*
நான் செல்லும் வேகத்திற்கு
நடக்க முடியாமல் ஏன் உனக்கு
மூச்சு வாங்குகிறது?
இத்தனைக்கும்
இந்த சக்கர நாற்காலியில்தான் அமர்ந்திருக்கிறேன்
*
பயணம் என்பது எங்கும் போய்சேர அல்ல
இருப்பிலிருந்து நீங்குதல்
பயணத்தில் எல்லாம் வேகமாக நகர்வதுபோல
வாழ்வில் ஒருபோதும் நகர்வதில்லை
*
நல்ல ருசியுள்ள உணவு எப்போது அமையும்?
நல்ல காமத்தின் இன்பம் எப்போது வாய்க்கும்?
நல்ல பசியின்போது
*
நேற்று வரை நீ எனக்கு யாருமில்லை
இன்று உன்னைத்தவிர எனக்கு யாருமில்லை
எத்தனை எளிதாக நிகழ்கிறது எல்லாமும்.
*