நாம் வாழும் காலம் – 25 :ஆதிமனிதனின் தையல் கருவி - கார்குழலி

பாகம் – 1

Tailors That Come Home To Your Doorstep | LBB, Kolkata தீபாவளி, பொங்கல் எனப் பண்டிகை நாட்களுக்கு முந்தைய தினம் தையல் கடைகளுக்குப் படையெடுத்துத் தையல்காரர் நம்முடைய துணியைத் தைத்துவிட்டாரா என்பதைத் தெரிந்துகொள்ளப் பதைபதைப்புடன் காத்திருக்கும் நாளெல்லாம் திரும்பி வராது என்றே தோன்றுகிறது. துணி வாங்கி ஆடை தைத்துப் போட்டுக்கொள்ளும் வழக்கம் அரிதாகிவிட்டது. அளவெடுத்து, துணி வாங்கி, நல்ல தையல்காரரைத் தேடிப் பிடித்து, நமக்குப் பிடித்த விதத்திலும் தேவையான நாளிலும் அதைத் தைத்து வாங்குவதற்கான நேரமோ பொறுமையோ இப்போதெல்லாம் யாருக்கும் இல்லை.

ஒருவேளை தையல்காரர் நாம் சொன்னபடி தைக்கவில்லை, சொன்ன நேரத்துக்குக் கொடுக்கவில்லை என்றால் எல்லாமே வீணாகிவிடும் என்ற பிரச்சனை வேறு. பல நூறு வாடிக்கையாளர்களில் ஒவ்வொருவரின் விருப்பத்துக்கும் ஏற்றவாறு தைத்துக் கொடுக்கும் தேர்ந்த தையல்காரர்களும் இப்போது இல்லை என்பது வேறு விஷயம். பல துணி வகைகளிலும் வடிவங்களிலும் விலையிலும் உடனுக்குடன் வாங்கி அணியக்கூடிய ஆயத்த ஆடைகள் கிடைக்கும்போது இதெல்லாம் நேர விரயம், அலைச்சல் என்று தோன்றுகிறது.

திடீரெனத் தையல்காரரைப் பற்றி ஏன் பேசுகிறேன் என்று யோசிக்கிறீர்களா? ஆதி மனிதர்கள் தையல்காரரின் உதவியுடன் ஆடைகள் தைத்துப் போட்டுக்கொண்டார்கள் என்பதற்குச் சான்றாக கல், எலும்பு போன்றவற்றாலான கருவிகள் கிடைத்திருக்கின்றனவாம். ஆதி மனிதனைப் பற்றியும் அவன் வாழ்வியலைப் பற்றியும் தொல்பொருள் ஆய்வாளர்களும் மானுடவியலாளர்களும் உலகின் பல இடங்களில் தொடர்ந்து ஆராய்ச்சி செய்து வருகிறார்கள்.

ஸ்பெயின் நாட்டின் பார்சிலோனாவுக்கு அருகில் இருக்கும் கேடலோனியா என்ற இடத்திலும் புதைபொருள் ஆராய்ச்சி நடைபெற்று வருகிறது. இங்கே கிடைத்த ஓர் This is how the 'sapiens' sewed their clothes 39,000 years ago - time.news - Time News எலும்புத் துண்டில் ஒரே அளவில் பள்ளம் விழுந்தது போன்ற அடையாளக் குறிகள் காணப்பட்டன. வெவ்வேறு வரிசையில் மொத்தம் இருபத்தெட்டு குழிவுகள் இருந்ததால் இவை கணக்கு வழக்கைப் பதிவுசெய்யவோ கலைப்படைப்பை உருவாக்கவோ போடப்பட்ட துளைகள் அல்ல என்பதும் உறுதியானது.

மேலும் இந்தத் துளைகள் எப்படி ஏற்பட்டிருக்கலாம் என்பதைத் தெரிந்துகொள்ள வெவ்வேறு பொருட்களைக் கொண்டு மீண்டும் மீண்டும் துளைபோட்டு ஆய்வு செய்தார்கள். இறுதியில், தங்களின் முடிவுகளை அறிக்கையாக வெளியிட்டார்கள். இது ஆடைகளை வடிவமைக்கும் கலைஞர்களால் பயன்படுத்தப்பட்டிருக்கலாம் என்ற கருத்தைத்தான் அந்த அறிக்கை தெரிவிக்கிறது.

இந்த எலும்புத் துண்டு சுமார் 40,000 வருடங்களுக்கு முந்தையது. மான், எருமை, செம்மறியாடு, குதிரை போன்ற விலங்குகளின் இடுப்பெலும்பின் ஒரு பகுதியாக இருக்கவேண்டும். அதிக ஆழமில்லாத பள்ளங்கள் என்பதால் எலும்புத்துண்டின்மீது தோல் ஆடையைப் பரத்தி உளியினால் துளைகள் போட்டிருக்கலாம். பிறகு இந்தத் துளைகள் வழியாக விலங்குகளின் நரம்பு அல்லது கனமான தாவர இழை போன்றவற்றை நுழைத்து அணிபவர்க்கு ஏற்ற அளவாகச் செய்திருக்கலாம். இதன்மூலம் ஆதிமனிதர்கள் சரியான அளவில் ஆடைகளை அணிந்தார்கள் என்பதும் அப்படியான ஆடைகளை வடிவமைக்கும் கருவிகளைப் பயன்படுத்தினார்கள் என்பதும் தெளிவாகிறது.

இந்த எலும்புத் துண்டுகள் ஐரோப்பாவில் கிடைத்த எலும்பாலான ஊசிகளுக்கு 15,000 வருடங்களுக்கு முந்தையவை. அந்தக் காலகட்டத்தில் வாழ்ந்த ஆதி மனிதர்கள் அணிந்த ஆடைகள் மட்கி மண்ணோடு மண்ணாக மறைந்திருக்கும். இதுவரை கிடைத்துள்ள ஆடைகள் வெறும் 10,000 ஆண்டுகளுக்கு முந்தையவை. அதனால் இதுபோன்ற மற்ற பொருட்களைக் கொண்டுதான் அவர்களின் ஆடை அணியும் பழக்கத்தையும் ஆடைகளை எப்படி உருவாக்கினார்கள் என்ற வரலாற்றையும் தெரிந்துகொள்ளமுடியும் என்பதாலும் இந்தக் கண்டுபிடிப்பு முக்கியத்துவம் பெறுகிறது.

Sewing Needles Reveal the Roots of Fashion – SAPIENS எல்லாம் சரி, ஆதிமனிதர்கள் எப்போதிருந்து ஆடைகளை அணியத் தொடங்கினார்கள் என்று கேட்கிறீர்களா? அந்தக் காலத்தின் ஆடைகள் மட்கிப் போயிருக்கும் என்பதால் மனிதர்கள் அணியும் ஆடைகளில் காணப்படும் சீலைப் பேனை ஆராய்ச்சி செய்து இதற்கான விடையைக் கண்டுபிடித்திருக்கிறார்கள். சுமார் 1,70,000 ஆண்டுகளுக்கு முன்னர் வெயில், பனி, மழை ஆகியவற்றில் இருந்து தங்களைப் பாதுகாத்துக் கொள்வதற்காக மனிதர்கள் ஆடைகளை அணியத் தொடங்கினார்கள் என்று ஒரு சாரார் கூறுகிறார்கள். வேறு சில ஆராய்ச்சியளர்களோ 1,20,000 ஆண்டுகளுக்கு முன்னர்தான் இந்தப் பழக்கம் தோன்றியது என்கிறார்கள்.

அந்த முதல் தையல்காரர் யார்? ஆணா பெண்ணா? அல்லது ஒரு குழுவின் கூட்டு உருவாக்கமா என்பதையெல்லாம் தெரிந்துகொள்வது இப்போதைக்குச் சாத்தியமல்ல. அல்லது அதுகுறித்த ஆய்வுகள் நடந்துவருகிறதா என்பதும் தெரியவில்லை. ஆனால் இப்போதிருக்கும் தையல் இயந்திரத்துக்கு முன்னோடிகளின் உருவாக்கத்தில் இயந்திரமயமாக்கல், அரசியல், புரட்சி எல்லாமே முக்கியப் பங்கு வகித்தது. 18ஆம் நூற்றாண்டின் இடைப்பகுதியில் சார்லஸ் வெய்ஸந்தல் என்ற ஜெர்மானியர் இயந்திரங்களில் பயன்படுத்தும் ஊசியை உருவாக்கி அதற்கான காப்புரிமையைப் பெற்றார். ஆனால் அந்த ஊசியை எந்த இயந்திரத்தில் பயன்படுத்தினார் என்பது பற்றிய குறிப்புகள் இல்லை .

அதே 18ஆம் நூற்றாண்டின் இறுதியில் தாமஸ் செயின்ட் என்ற ஆங்கிலேயர் தோலைத் தைக்கும் இயந்திரத்தை உருவாக்குவதற்கான வரைபடம் ஒன்றை வரைந்து அதற்கான காப்புரிமையையும் பெற்றார். இந்த வரைபடத்தை அடிப்படையாகக்கொண்டு 1874ஆம் ஆண்டு வில்லியம் நியூட்டன் வில்சன் என்பவர் தையல் இயந்திரத்தைச் செய்தார். கையால் இயக்கும் விசையினால் துல்லியமாக இயங்கியது. அன்று முதல் இன்று வரையில் தையல் இயந்திரங்கள் ஆடைகளை மட்டுமின்றி இன்னும் எத்தனையோ அன்றாடப் பொருட்களை உருவாக்குவதில் முக்கியப் பங்கு வகிக்கின்றன. தையல் இயந்திரம் இல்லாத உலகம் எப்படி இருக்கும் என்பதைக் கற்பனைசெய்துகூடப் பார்க்கமுடியாது என்பது உண்மைதானே.

(தொடரும்)

நாம் வாழும் காலம் – 25 :ஆதிமனிதனின் தையல் கருவி – கார்குழலி

தொடரின் முந்தைய கட்டுரைகள்: